八月三十一號，正式搬番入大埔啦
成屋堆滿紙箱，紅白藍，所以我同panda爸都儘量想清哂佢，好讓間屋睇落冇咁亂，想da仔冇咁驚囉
由點零鐘執到成晚上十一點，腳踭痛到屎屎吓，梳洗完，才巡吓卜同面書，跟住就瞓啦．
但，成晚都瞓唔著，輾轉反側
一入到門口，我第一時間張da仔擺入房（廳中實在太亂，全是紙箱同紅白藍）．
da仔一支箭咁就躲入床下底，我就由得佢，等佢適應吓個新環境，我地就跟住開始在廳中拆箱執野啦．
我將da仔用開的水兜，糧碗同廁所，放在我房內，好讓牠可以進食同去大小二便．
執野期間，如入房，我地都會叫：dada，媽咪係度呀，唔使驚呀．．．
直至數粒鐘後，da仔全程冇出過黎，糧餉，水兜，廁所全部完封不動，我開始擔心．
我驚da仔脫水，於是趴在地上，拖da仔出黎，然後擠ｄ水比佢，同埋安撫佢，飲完水，佢又拿拿淋咁走番入床下底
唔食野，點得架，於是開咗罐佢最愛的慕士罐罐，見佢鼻子郁吓郁吓咁，但唔行出黎食．
panda爸都好錫佢架，da爸將碟慕士罐罐放入床下底，睇吓佢食唔食．（我地又繼續執野）
都唔知隔咗幾耐囉，panda爸同我講，佢有食到呀～～
實在太好啦，感動中～～
後尾，差不多我們臨瞓前，我又拖亞da仔出黎，安撫吓佢，佢見到個廁所，就去咗次小的，佢可能忍咗好耐呀．
跟住我同佢抹patpat，抱吓佢，（唔想佢再躲床下底），放番落地下時，佢行咗去panda爸的工作房．
跟住仲坐咗在個膠箱面上，我尤得佢自由發揮．
到我們熄燈瞓覺時，佢仍在工作房內．
半夜時，突然聽到佢叫，ｄ聲我們從未聽過的，嚇得我們彈起，見佢企在房門口叫，於是抱佢上床，我攬住佢，佢在被窩內行黎行去．跟住又走貓．
又唔知半夜幾多點，聽到佢食野聲（安心）．
又唔知幾多點，佢突然又在床邊喵我，我又抱入被窩內，安撫一輪，佢又走貓，如是者，都有搵咗我二三次．
今早要番工，（十萬個不呈願），番工前，幫da仔添糧，換水，當我在廚房準備時，佢在工作房門邊偷偷望我，佢知我整野食比佢．但佢唔敢入出廳呢．
我又比慕士佢當早點，我特登放在近廳的走廊位，好在da仔都敢慢慢行出黎食 (又安心)．
食完後，跟住佢又在哥哥房門前喵喵叫，要叫開門，於是我開咗哥哥房比佢，佢走行咗入去巡視一番，跟住仲在哥哥房門口，碌黎碌去，真係好開心呀．睇黎開始適應咁啦．
好多謝大家的關心同祝賀，在此謝過～～
