難道我真的是貓奴嗎?

前幾天，我同Panda爸有以下的對話：

他 :ｅ家ｄ機票都好平咁喎，不如去英國行吓囉。

我 : 好呀，你同亞仔去吖，我要睇住Panda。

跟住就再冇對話啦。

我跟朋友講起這件事，她們異口同聲都話我唔啱。她們的意見是，去旅行，梗係想同枕邊人去先有意思架嘛。

我知，我明。但，我真係唔捨得寶貝仔呢。（我絕不會將牠擺在寵物店的）就算有人幫我睇，我都驚寶貝仔唔適應，怕牠數天見不到我們，唔知寶貝仔會點諗。

由我第一天養Panda開始，我就要對Panda作出承諾，要照顧牠一生一世，絕不會棄牠而去的。遑論就算過澳門一，二天我都唔會去的。

好似以前咁，Panda爸話想去北京，我又係咁回應佢，你同亞仔去呀，我要睇da da。講真，大陸我真係丁點兒興趣都冇架。那次，他和亞仔就去了北京一趟。

家人緊要定寵物緊要？要我揀，我真係唔識揀。可以咁講，同樣重要，無分彼此。

如我冇養寵物，當然去邊都應承他啦，就唔會有以上的對話。但，真的，我捨不得離開da da喎。

究竟我有冇錯呢？但我知Panda爸都係咁錫Panda架～希望佢能明白我的感受就最好了。